Idazten ari dela idazten duen idazlea

ibanIban  Zalduaren Idazten ari dela idazten duen idazlea edo literatura gaixotasun gisa (Elkar, 2012): izenburuak berak broma bat dirudi; ez da ez, broma, baina bai barruan aurkituko ditugun ipuinen tonua aurreratzen digun kakoa.

Ezaguna eta ongi baloratua da euskal irakurleen artean Zalduaren ipuingintza, bere gaurkotasuna , zorroztasuna, umorea, literaturari buruzko erreferentziak…, baina oraingo honetan pixka bat haratago doa,  ipuin metaliterarioz osatu baitu liburua: Kafkaren itzultzailea, Idazlea irakurketa tailerrean, Literaturaren gaitza eta horrela, 20 ipuin eta eskaintza (berezi) bat (hau ere titulu polita izan zitekeen, Nerudari keinu bat eginez) osatu arte.

Bertan aurkituko dugu, besteren artean: gure literaturari erreferentziak, unibertsalari zer esanik ez, komikien aipamenak (Zalduaren beste afizio eta  idazgaietako bat), idazle neurotikoak  eta  kritikari alferra, Itzulpengintza eta Sari-emanaldia (horrelaxe izena dute bi ipuinek)… eta umorea, are gehiago, ironia, barra-barra.

“Gustura, erraz eta irribarrearekin irakurtzeko 22 ipuin” dio Asier Sarasuak Eibar.org blogean. 22? Bai noski, kontra portadan sartu baitigu Ibanek azken eztena.

Bakartxo Iguaran Garmendia

Usurbilgo Sutegi Udal Liburutegiko laguntzailea

liburutegiak.blog.euskadi.net/usurbil

Jarraitu eta partekatu:

Deja un comentario

Itxi menua